القْرَايَه بالغَايْطَة

الكاتب يكتب
والقاري ما بْغَا يْفهَم
الحرُوفْ بَايْنَ ذْهَب
وهو بِهَا مَا يْهتم
عْمنَلُّو خط عريض
قراه كِ دْجاجة دْ بِيضْ
قَقَقَقَقَقَقَقَقَقَقَقَقَقَقَ
الكاتب سَاعْتُو مْحَقْقَ
كل ساعة يكتب ورقة
والقاري ساعتو حَمْقَ
نْ لْحَرْف حَافظ والخَط رَاهْ يْفُكُو
مْلِي تْقولو قْرَا يدُّْو فْرَاسُو يْحُكُّو
عْمْنَلُّو سْطَارْ تحت الكتابة عَا الله يْقْرَا دَابَ
العجب كازْ عليها كِ السحابة
قُلْنَالُو قْرَا القْرَايَا فَرْضْ
راه أول كلام نْزل
يجاوب راه فيَّ المَرْض
وبجميع العلايل يتعلل
رحمة الله عليك يا المجذوب
وعلى كتابك لمغلف
كتابنا رجع مكذوب
والقاري عْلِينَا تْعَفّفْ
آش المعمول المجذوب
كتابنا راه مؤلف
أسيدي عملو الغَايْطَة
يجيك العاري والقاري
واخا تكون وراقو بَيْطَة
عملنا بكلام المجذوب
ونجحت القضية
كتابي فاق لْكْتُوب
كل صفحة منو صبحت أغنية
إذا كان السر كامل في الغيطة
غير نوزن القافية
ونعمل حْرُوفْ شْطَّاحَة
ونْشْكْلَ بالسْبْنِيَة.