ألف شكر لإسرائيل

,
يا ابن مصر يا بطل
ياللى ثورت فى الميدان
جانا بيان من النظام
إنك عميل
وان انت بتطبق أجندة اسرائيل
يا ابن مصر ياللى مت فى الميدان
ده شيخ الأزهر والبابا
وسليمان الألعبان
بييحلفوا على الانجيل
وع القرآن
إنك قبضت ثمن موتك
وبعت روحك للأمريكان
يا سويس
مش انتى اللى صمدتى
ده كان مهندس اسرائيلى
هو اللى دس فى صدورنا حبك
هو اللى صحى بعد نومة طويلة
شعبك
هو اللى مات عشان تعيشى
كان مهندس اسر ائيلى؟؟؟
وانا اللى فاكر انى مصرى
وانى وطنى يا زميل
أطلع عميل؟
ولإسرائيل؟
وثورتى اللى حركت كل الشعوب
م اليابان إلى رواندا
تطلع أجندة ؟
طب دى تبقى اسرائيل
دولة صديقة
مدت ايديها لشعب مصر تنشله
من عار وضيقه
وفى الحالة دى ليا الشرف
إنى عميل
وألف شكر لإسرائيل