ميديتل...سيكسي شات

واخا هاد ليام صدعو لينا راسنا بديك الخبار بلي ميديتيل ولات مغربية من ساسها لراسها، لكن هادشي تيبان غير سكبي وهضرا خاويا. والدليل هو داك الخدمة ديال الشات لي مافيها ما يتشاف ما يتقرا، كلها مسخ، ها صالون ديال الشات فيه دوك الكيفكيفيين، هالي فيه الخارجات على الطريق، المهم "تريكيل" حشمات على عراضها ومبغاتش تكمل ليكم آش مكتوب فداكشي، حيت بيناتنا داكشي ماااااااسخ.
واحد ساط مسؤول فميديتيل قال ل"تريكيل" بلي ميديتيل مبريا من داكشي، ومافراسها والو، وبلي ماشي هيا لي صوبات دوك الصالونات ديال الشات، والناس لي صوبوهم، وميقدروش يحيدوه حيت مصوب فالصبليون. ولي تنعرفو هو لي مقادش على شي حاجة لاش يتلاح ليها؟
وا السيدة بغات تشوف آش كين فداك الشات، دخلات وصلوها 3 إس إم إس ما فيهم ما يتقرا، ولات باغا غير البورطابل يسكت ليقلبو راجلها وي شك فيها. واحد السيد ملي عرف هادشي مشا حيد البورطابل لولادو.
ولايني هاد ميديتيل باغا تفرتك الشمل للعائلات المغربية.
دابا خاصنا نسولو الزمزمي واش بورطابل ميديتيل حرام ولا حلال، وما رأي الشرع في ذلك. الحاصول اللي قاس البروطابل يمشي يعاود لوضو..