طاحت ف الشمس

الشمس هرقت عل سراولها...
ف الليل ..
سال عل الأرض..
الزغب والويل
البحر نشف من المعنى
البحر نشف
نشف البحر
.
قالوا نشف!
بانوا الكذوب عل وجه الصخر
واضحين ..
عل وجه الحجر
*
ف حجر الأرض بين رجلين الوقت
كيته ذاك...
اللي عاش عل الخاوي ..
داز التاريخ من حداه وهو يشوف
الهبيل كان هالكه الخوف..
وعامر تلاوي ..
قتله الصبر..
بنادم معمي موسخاه..
جلايل
كلها ونيته
كله واش ناوي..
*
راني بالكلام والشراع..
ذاك المزراك شحال يساوي
والقصيده مايسوى وسط
يدي صباع
ماقشع
مافهمني علاش
داوي
رد وحروفه زياده ..
وعامره صداع
*
قال الغريب:
والضو يرعى راسه
براسه ....
ف قلوب ناشفه
كية اللي وحده
وسط ناسه
قلت أنا :
سعداته اللي مات وسط القصيده
هاك....
حريف مدرح
انثر..واشخر!!!
ورد لي ندير شي جبيده..
قصصتها من كبداتي ألف سؤال
مسيوسه ف روحي
وعاطيها للحال
*
قالت القصيده للروح:
هكذا يعيشوا الطيور
تاياكلوا الضوا
وتايشربوا النور
*
زاوكت فيكم اعطيوني حقي منكم ف الضو
والنور..
نعطيكم حقكم فيا
المستور
*
أجيوا بالمعاني نحياوا
ونهربوا من الزمان المسعور
*
هذوا القتاله أش قضاوا
راجعين بالعالم اللور..
*
اللي بغى يقتلني غير يقتلني
بضحكه..
واللي بغى يحييني غير يحييني
بضحكه ..
نموت ضاحك ألف مره احسن لي ..
مانموت مره فابور ..
*
أجيوا نحياوا بلا تغوبش
بلا شوفات الثور
*
عوض نطولوا الزغب
نطولو العقل ونديرها ديكور
واك واك الحق
ماينفع غير المعقول ....
الغنا(ء)
فيه وفيه ..
أمي لحسن ماشي كيف الزرزور