زجل : (حالتنا ما هي حالة)

احنا سمحنالها تغدر بنا
عيشتها مرارة
زادت مرار حتى حرارت علينا
وحنا معاها جرارة
حيت تبدلنا و ما بقى خير فينا
اش هاذ الحالة
يا لقوم القوالة
نسا ولات رجالة عقالة
الرجلة صبحت عيالة…. بلبالة
حتى لفقيه رجع سفيه
ما بقاوش يتيقو فيه
ما يديرو بكلامو
…..وخا أفعالو محسوب عليه
اش هاذ الحالة
لي شفنا فيها لعجب
تقري وتعلم بنادم ما وعى ما تأدب
تبني وتعلي
…يجي واحد فالالخر يخرب
لولاد والبنات
بلا ما يتراقبو
يتصاحبو يتحابو
..نهار يتخطبو
يفرحو ويزوقو
يتزوجو من شهورهم الاولى يطلقو
اش هاذ الحالة
الزواق فالمشطات
وأنواع المبيقات
حتى الخير شاط فالنشاط
قلة النية فالصداقة
كترت العياقة
وقلة اللباقة
شحال فقدت من علاقة
تقافتنا حماضت بسالة
ونوارتها نشافت ومدبالة
اش وصلنا لهاذ حالة
لي حياتنا رجعت فيها مهزلة
واش ف العالم كاينا هاذ الحالة
ولا غير حالتنا لي تبهدلت بهدالة
خلات قيمنا مشات للزبالة
وتوبنا الحرير بقى يتبالة