بوليس سطات كيقول أن طالب ENCG سطات مات منتحر والتحقيقات بدات مع لي جاب ليه ليصانص

معطيات جديدة جابتها "گود" على وفاة الطالب ديال المدرسة الوطنية للتجارة والتسيير بسطات محروگ فغابة حدا جامعة الحسن الأول، نهار الاربعاء ومات يوم امس الجمعة فسبيطار من سبيطارات كازابلانكا.
وكشفات مصادر گود القريبة من التحقيق ان بحث دقيق ديال لاپيجي بين ان الامر عندو علاقة بمحاولة انتحار ديال هاد الولد ومزال ممعروفش السبب المباشر علاش بغا ينتاحر.
وكشفات نفس المصادر ان التحقيق بعطدا مع شخص مساهم فهاد العملية، من بعد استقراء كاميرات ديال سطاسيون ليصانص لي جاب ليه منو ليصانص باش شعل العافية فراسو.
قسم التواصل فالمدرسة الوطنية للتجارة والتسيير بسطات قال فحديث مع "گود" ان كيتأسف لهاد الحدث والادارة ككل كتتأسف وكنترحمو على الطالب وكان خلوق وضريف ومافيهش المشاكل،. معرفتاش بالضبط آش كان واقع عندو فهاد الشي ونتسناو تحقيقات البوليس ونتائجها