الحسنية شمتت الرجاء بهدف قاتل وحركاس تطرد للماتش الثاني وغايغيب على الديربي

سالا الماتش ما بين الرجاء الرياضي والمضيف ديالو حسنية أكادير بفوز الأخير اليوم الأحد بملعب أدرار بأكادير، برسم الدورة 20 من الدوري الاحترافي المغربي.
المباراة بين الرجاء وحسنية أكادير سالات بنتيجة 2 أهداف مقابل واحد للسوسيين، وكانو الحسنية هم الأولين اللي ماركاو فالماتش عن طريق عزيز قايدي فالدقيقة 37، وجابو الرجاء التعادل بهدف ماركاه روجر أهولو فالدقيقة 68،
وفالدقيقة 92 تحصل جمال حركاس على بطاقة حمراء من بعد مناوشة مع أحد لاعبي حسنية أكادير شاف الحكم الداكي الرداد أنها كتستحق الطرد، وغادي يغيب على الفريق فاللقاء المقبل ضد الوداد فالديربي، وهذا هو الطرد الثاني على التوالي ديال حركاس، حيث خذا بطاقة حمراء فالماتش الماضي د الرجاء فالعصبة ضد حوريا كوناكري.
وفالوقت اللي الجميع كان كيظن أن الماتش غيسالي بالتعادل، قدر حسنية أكادير يخطف هدف الرباح بواسطة يوسف ميهري، مستغلا طرد جمال حركاس من الرجاء.
وتحصل حسنية أكادير من بعد هذا الانتصار على 3 نقاط رفع بها رصيدو إلى 20 نقاطة، وكيحتل المركز 13، أما الرجاء الرياضي بدات كتقلص الحظوظ ديالو فالمنافسة على اللقب، وتجمد رصيدو عند 33 نقطة وكيحتل المركز الرابع.