شعلت فأسفل ترتيب البطولة.. خريبكة ربحت السوالم وقربت من وجدة والحسنية

شعلات المنافسة فأسفل ترتيب البطولة الإحترافية لكرة القدم بين الفرق اللي كتبحث على البقاء فالقسم الوطني الأول، من بعدما حقق فريق أولمبيك خريبكة الرباح على شباب السوالم فالجولة 19، قبل لحظات من مساء اليوم الأحد فتيران الفوسفاط بخريبكة.
وسالا الماتش بين أولمبيك خريبكة وشباب السوالم بفوز الخريبكيين بنتجية هدف واحد لزيرو، وهو الهدف اللي ماركاه أيمن حديدي لاعب شباب السوالم على المرمى ديال فريقو فالدقيقة 38 من عمر المواجهة، ظلت النتجية كيفما هي حتى نهاية اللقاء.
الرباح ديال أولمبيك خريبكة اليوم، جعل المنافسة تشعل فأسفل ترتيب البطولة حيث الخريبكيين المحتلين للمركز قبل الأخير قلصوا الفارق مع مولودية وجدة وحسنية أكادير إلى 3 النقاط، من بعدما رفعوا رصيدهم إلى 14 نقطة، وبينهم وبين تطوان 6 النقاط فقط.
وبالنسبة لفريق شباب السوالم اللي كتعتبر الخسارة ديالو مع خريبكة مفاجئة بالنظر المستوى والنتائج اللي حقق هذا الموسم، فتجمد رصيدو عند 25 نقطة وكيحتل المركز السابع فترتيب البطولة.