فينيسيوس نجم الريال: شكرا لك يا المغرب وللحشد اللي شجعني فالموندياليتو

كتواصل الإشادات بالمغرب، من طرف اللاعبين والمدربين اللي شاركو مع فرقهم فكأس العالم للأندية بالمملكة المغربية، وهاد المرة جا الدور على النجم البرازيلي ديال ريال مدريد الإسباني فينيسيوس جونيور اللي ربح اللقب البارح مع الفريق الملكي.
وطل فينيسيوس جونيور فانستغرام ديالو وشكر المغرب والمغاربة اللي شجعوه هو فريقو ريال مدريد وقال: "شكرا لك يا المغرب راه شفت فكأس العالم للأندية شغفك، ووجود هاد الحشد فصفي راه كان شي حاجة مميزة بزاف".
وكان ريال مدريد الإسباني ربح كأس العالم للأندية للمرة الخامسة فالتاريخ ديالو، من بعدما ربح البارح السبت فتيران مولاي عبد الله بالرباط الهلال السعودي بنتيجة 5 مقابل 3 فالفينال، وكان نصيب فينيسيوس جونيور من أهداف الفريق الإسباني على الفريق السعودي 2 أهداف.