أجواء عائلية كتسيطر على معسكر الوداد.. اللاعبين ناشطين ومركزين فأول حصة بمركز محمد السادس

بدأ الوداد الرياضي صباح اليوم الجمعة، التداريب ديالو بمركز محمد السادس لكرة القدم وكيوجد المونديال، اللي غادي يلعب أول ماتش فيه مع الهلال السعودي نهار 4 فشهر فبراير للي جاي فربع النهائي.
فريق الوداد تحت إشراف المدرب المهدي النفتي بدا قبل لحظات أول حصة تدريبية ديالو فسونطر محمد 6، وسط أجواء زوينة ومعنويات مرتفعة عند اللاعبين اللي أغلبهم بدأ كيتدرب مع المجموعة، أما العناصر اللي عندها بروتوكول خاص فحال زهير المترجي والسنغالي صامبو جونيو تدربو بشكل منفرد.
ومعول الوداد الرياضي بجميع المكونات ديالو يحقق نتائج إيجابية فكأس العالم للأندية 2022، خصوصا وأن البطولة منظمة فالمغرب الشي اللي كيعني أن الفريق غيكون مساند بالجماهير الودادية والمغربية، من أجل تحقيق إنجاز تاريخي، والبداية غتكون ضد الهلال السعودي فربع النهائي الأسبوع المقبل.