بيان غير موقع منسوب ل"حركة تصحيحية" فالبام كيطالب باستقالة وهبي.. وقيادي ل"كود": مكنردوش على الوهم وخاص تكون عندهم الشجاعة يعلنو الاسماء ديالهم

خرج بيان فالساعات فاللي دازت منسوب لحركة "تصحيح المسار" داخل حزب الأصالة والمعاصرة، كيطالب وزير العدل عبد اللطيف وهبي بتقديم استقالتو من الوزارة والامانة العامة والاقرار بذمته المالية ومصدر ثروته ووضعيته مع ادارة الضرائب.
البيان غير موقع، كاينا شكوك بلي اعداء وهبي داخل البام خرجوه فهاد الظرفية لي ناض فيها صداع على نتائج مباراة امتحان المحاماة. طبعا حتى حد متبناش البيان.
قيادي فالمكتب السياسي قال ل"كود" :"ميمكنش نعلقو على الوهم وعلى مصدر مجهول. واللي بغا يتواجه داخليا يبان ولا نخاف من المعارضة الداخلية بل نقول لها مرحبا".
وطالب ذات القيادي من أعضاء الحركة التصحيحية الخروج إلى العلن بدل الاختباء وراء الحواسيب.
البيان كيقول بلي تصريحات وهبي أضرت بصورة البام وخاص يتفتح تحقيق نزيه وشفاف وربط المسؤولية بالمحاسبة.
دبا حسب مصادر "كود" كولشي ممكن يكون مور البيان غير الموقع، سواء تيار حكيم بنشماش أو المعارضين لي دخلو فصراع قانوني وقضائي مع وهبي من قبيل القيادي السابق محمد ابودرار، ويقدر يكون مسرب من جهة هشام المهاجري، لي قدم استقالتو بطريقة قسرية من المكتب السياسي.