الركراكي وولادو سدو على ريوسهم ودخلو فمرحلة التركيز وبداو كيوجدو لفرنسا

غادي يبدا المنتخب الوطني المغربي اليوم الإثنين، يوجد للماتش الجاي فنصف نهائي كأس العالم قطر 2022، ضد منتخب فرنسا واللي غادي يتلعب فتيران البيت فالعاصمة القطرية الدوحة.
المنتخب الوطني المغربي ومن بعدما استافدو اللعابا ديالو البارح الأحد من يوم راحة، مكافأة لهم حيث ربحو ماتش البرتغال فربع النهائي وتأهلو للدومي فينال، غادي يديرو اليوم الاثنين أول حصة تدريبية إستعدادا للماتش الجاي ضد فرنسا، وكيف ما العادة ديال الناخب الوطني وليد الركراكي والطاقم ديالو مع اقتراب كل ماتش كيحاولو يبعدو اللعابا ديال المنتخب الوطني المغربي من الضغط و يخليهم مركزين وحيث بقات 48 ساعة للماتش ضد فرنسا، قررو تكون الحصة التدريبية ديال اليوم الاثنين مسدودة وبعيدة على وسائل الإعلام.
ومن المنتظر يكشف الناخب الوطني وليد الركراكي للعابا فالحصة التدريبية ديال اليوم اللي غادي تكون فالعشية فتيران الدحيل، على النهج التكتيكي اللي غادي يلعبو به ضد منتخب فرنسا، وهو أمر كيتطلب تركيز وأيضا إبعاد أي واحد غريب على بعثة المنتخب الوطني المغربي من تيران التداريب تفاديا لتسريب أي معلومة للخصم، خصوصا وأن هاد الحصة وهي ما قبل الأخير غادي تعرف تحليل ودراسة المنافس من جميع الجوانب وتعريف اللعابا المغاربة بنقاط القوة والضعف ديالو وكيفاش غاديين يتعاملو معه فالماتش.
وغادي يلعب المنتخب الوطني المغربي نهار الأربعاء الجاي فتيران البيت فنصف نهائي كأس العالم قطر 2022، ضد منتخب فرنسا بطل العالم 2 مرات وحامل لقب آخر نسخة، فماتش حاسم للأسود والرباح فيه كيساوي التأهل للنهائي ومواصلة كتابة التاريخ فهاد النسخة من كوب ديموند من بعدما تأهلو فيها لربع النهائي لأول مرة فتاريخ كرة القدم المغربية، ومن بعدها لنصف النهائي كأول منتخب افريقي وعربي كيوصل لهاد المرحلة المتقدمة من البطولة، أما الخسارة كتعني الاكتفاء بالمنافسة على المركز 3.