تيليفون وكيل أعمال سفيان أمرابط ما كيسكوتش من العروض والنكالزا مضاربين عليه

بدات العروض كتقاطر على الدولي المغربي سفيان أمرابط نجم وسط المنتخب الوطني المغربي وفيورنتينا الطالياني، من بعد المستوى الكبير والقوي اللي ظهر به مع المنتخب الوطني المغربي فكأس العالم قطر 2022، وساهم فالتأهل ديالو التاريخي إلى ربع نهائي البطولة.
وكشف الطالياني فابريسيو رومانو اللي متخصص فانتقالات اللعابا والمدربين وتعاقدات الفرق فالعالم، بلي سفيان أمرابط عندو عروض كثيرة، وقال بلي وكيل الأعمال ديالو جاوه بزاف ديال المكالمات على قبل أمرابط من أندية فبطولة الننكليز، حيث اللعاب كيتعتبر أفضل واحد فالمركز ديالو فكأس العالم 2022.
ومن أبرز الفرق اللي عندها رغبة فالتعاقد مع سفيان أمرابط، وكتنافس على الخدمات ديالو كاين ليفربول وتوتنهام من الننكليز وأتليتيكو مدريد من إسبانيا، فالوقت اللي فرقتو فيورنتينا الطاليانية ما باغياش تطلقو ولكن غادي يكون صعيب عليها تقاوم العروض ديال الأندية الأوروبية الكبيرة اللي كتسابق باش تسني مع النجم المغربي فالانتقالات الشتوية اللي جايا.