الركراكي تايق فاللعابا ديال المغرب وها شنو قال قبل ساعات من ماتش إسبانيا

عبر الناخب الوطني وليد الركراكي على الثقة ديالو فاللعابا ديال المنتخب الوطني المغربي قبل ماتش إسبانيا فثمن نهائي المونديال اليوم الثلاثاء، وأنهم قادين يربحو ويتأهلو لربع نهائي البطولة.
ونشرت شبكة "بيين سبورت" القطرية قبل لحظات من هاد الصباح مقتطف من حوار مع وليد الركراكي قال فيه: "هادشي اللي درنا حتى لدابا واعر بزاف، ولكن أنا عندي طموح مازال وعندي ثقة فاللعابا ديالنا، وما خصناش نتعقدو حيت غادي نلعبو ضد الإسبان ومانخلقوش عقد حيث حنا أفارقة وراه كلشي ممكن".
وأكد وليد الركراكي على الثقة ديالو فاللعابا ديال المنتخب المغربي والإمكانيات ديالهم وقال: "ملي يكون عندك ظهيرين عالميين فحال نصير مزراوي وأشرف حكيمي راه غادي تكون عندك قوة فالأطراف، وملي يكون عندك فحال حكيم زياش وسفيان بوفال ومعهم لعابا شباب راك غادي تنجح".
وغادي يبدا الماتش ديال المغرب وإسبانيا اليوم مع 4 ريال لعشية بالتوقيت المغربي فتيران المدينة التعليمية، ومعول وليد الركراكي يتورخها هو اللعابا ديال المنتخب الوطني المغربي ويتأهلو لربع النهائي لأول مرة فتاريخ الكرة المغربية.