مدرب بلجيكا: الخنوس والزروري ختارو يلعبو للمغرب من قلبهم وخاصنا نحتارموهم

عبر روبيرتو مارتينيز مدرب المنتخب البلجيكي على تقبلو لرغبة كل من بلال الخنوس وأنس الزروري باش يلعبو مع المغرب، وأكد بلي هادشي من حقهم والاختيار كيبقى للقلب.
مارتينيز فالندوة الصحافية قبل من ماتش المغرب وبلجيكا، علق على انضمام بلال الخنوس وانس الزروري للمغرب وقال: "خاصك تلعب للمنتخب اللي كتلعب للأندية ديالو، ولكن ملي كتلعب للمنتخب الوطني خاصة تلعب من قلبك".
وكمل مدرب بلجيكا وقال: "بلال الخنوس كان معنا قبل كورونا وكان مهم بالنسبة لنا ولكن كان ديما كيبغي يلعب مع المغرب واخا كان كيلعب مع بلجيكا".
وأكد روبيرتو مارتينيز: "راه كاينين بزاف ديال اللعابا تزاد وعاشو فبلجيكا ولكن كيبغيو يلعبو لمنتخبات بلدانهم الأصلية وهادشي مفهوم ومقبول بزاف".
وقال مدرب بلجيكا: "بالنسبة لانس الزروري راه دويت معه ولكن خاصنا نتقبلو الرغبة ديال اللعاب، وحنا كاتحاد بلجيكي خاصنا نبدلو الخطة ديالنا وبالنسبة للعابا اللي باغيين يلعبو مع منتخبات أخرى يمشيو لها من الفئات السنية الصغيرة".