رئيس الكاف عاجبو نيفو المنتخب مع الركراكي واللعابا ديال المغرب وطلب من حكيمي يتصور معه

عبر الجنوب إفريقي باتريس موتسيبي بلي عاجبو النيفو ديال المنتخب الوطني المغربي والخدمة اللي دايرها الطاقم الجديد فليكيب ناسيونال بقيادة المدرب وليد الركراكي، وهادشي ملي زار اللعابا اليوم الاثنين هو وفوزي لقجع رئيس الجامعة الملكية المغربية لكرة القدم قبل ما يلعبو أول ماتش لهم فكأس العالم 2022 ضد كرواتيا.
وكشف مصدر مطلع بلي رئيس الكاف باتريس موتسيبي تكلم مع وليد الركراكي الناخب الوطني، وقاله بلي عاجباه الطريقة باش كيخدم هو الطاقم التقني مع ليكيب ناسيونال، وهادشي لاحظو فليماتش الثلاثة اللي لعب مؤخرا وبلي المستوى ديال المنتخب تحسن.
موتسيبي وحسب نفس المصدر، ماشي غير طريقة وليد الركراكي اللي عاجباه، ولكن حتى مجموعة من اللعابا فالمنتخب كيعحبوه وهادشي كان واضح عليه وهو فالحصة التدريبية ديال المنتخب الوطنيهاد الصباح، فحال أشرف حكيمي اللي عيط عليه وبدا كيتكلم معه وطلبو باش يتصور معه ضروري.
موتسيبي أكد بصريح العبارة فالزيارة اللي دار للمنتخب المغربي اليوم، بلي معول على أشرف حكيمي وصحابو باش يشرفو المغاربة وإفريقيا فكأس العالم 2022، ويفرحوهم وقالهم بلي متفائل بهم فهاد البطولة وتايق فيهم.