جدارمية برشيد دارو تدخل وطلقو القرطاس بعدما هجمو عليهم عصابة ديال "الدرنوني" البزناز او حجزو طوموبيل عامرة مخدرات

البارح فالليل عاش دوار الدرانة ضواحي مدينة برشيد فيلم ميراكيني ديال الأكشن، بعدما اضطرت عناصر الجدارمية تطلق 4 القرطسات فسما في تدخل باش تحبس واحد الهجوم خطير من طرف أفراد عصابة الملقب ب "الدرنوني" البزناز لتيبيع جميع أنواع المخدرات، منها البوفا والقرقوبي والكيف.. أو لتصاب فيه دركي تضرب فالراس بالحجر او تدكدكات فهادا الفيلم سيارة ديال "سيً بيجي" ، أو تحجزات 500 لتر ديال الماحيا، و10 غرامات بوفا، و25 كيلو ديال الكيف وطابا، و300 قرعة ديال الجعة وكمية من الأقراص المهلوسة.
وفي تفاصيل هاد الفيلم قالت مصادر "كود"، بان عناصر الدرك الملكي بسرية برشيد دهمات مكان وحد البزناز فالدخلة ديال مدينة برشيد، بعدما رسمت خطة للعملية ، بحيت توزعت عناصر الدرك على مجموعتين الأولى بسيارات مدنية والمجموعة الثانية بسيارات ديال المصلحة، أوقصدو مكان تيبيع فيه البزناز السموم ديالو، لكن بعدما شاف تاجر المخدرات عناصر الدرك ا قصد سيارة من السيارات لي كانو فيها عناصر الجدارمية او دكدكها، في الوقت لي هجمو فيع المرافقين ديالو بالحجارة على أفراد الدرك، هذا الهجوم دفع أحد الدركيين باش يشهر السلاح الوظيفي ديالو وتيري فالسما أربع قرطاسات باش يردع هذا العصابة، الأمر للي جعل "البزناز" يخلي طمومبيل ديالو عامرة سلعة ويهرب مستغلا درايته بالمكان، السيارة لي جروها لمركز الدرك الملكي بسرية برشيد، في انتظار حلول مصلحة التشخيص القضائي التابعة لسرية سطات من أجل القيام بالمتعين من أجل الكشف عن حقيقتها .
المصدر ديال "كود " تيضيف أن افراد الدرك حجزو داخل السيارة كمية مهمة من المخدرات بشتى أنواعها مع تحرير مذكرة بحث في حق أفراد هاد العصابة على الصعيدين المحلي والوطني فيما تواصل مصالح الدرك البحث عن المتهمين بتعليمات من النيابة العامة المختصة لتوقيفهم .