5 لعابا ما عيطش ليهم الركراكي يشاركو فالمونديال غادي يكونو مع المنتخب فقط وها علاش

علم موقع "كود" أن عدد من اللاعبين اللي ما توضعوش فاللائحة النهائية ديال المنتخب الوطني المغربي اللي غادي تلعب كأس العالم 2022، غاديين يرافقو البعثة ديال ليكيب ناسيونال إلى قطر.
وكشف مصدر مطلع لموقع "كود" أن لائحة الإنتظار والاحتياطيين واللي كتكون من لعابا ما عيطش ليهم الناخب الوطني وليد الركراكي فاللائحة النهائية، غادي تسافر مع المنتخب وهي مكونة من 5 ديال اللعابا تحسبا لأي طارئ يقدر يفاجأ الأسود سواء إصابات فصفوف اللعابا اللي فلائحة النهائية أو غيرها.
وكيبقى الإسم اللي تأكد ل "كود" بلي غادي يسافر مع المنتخب الوطني المغربي لقطر بالرغم من عدم التواجد ديالو فلاليست فينال، هو حارس مرمى الرجاء الرياضي أنس الزنيتي اللي كيبقى أبرز الأسماء فاللائحة الاحتياطية، فالوقت اللي كاينة أسماء أخرى مرشحة للتواجد فقطر مع هاذ اللائحة وكيتعلق الأمر بكل من أيوب الكعبي وسفيان رحيمي ومنير الحدادي، مع العلم أن اللاعبين اللي غادي يكونو فلائحة الانتظار او الاحتياط فغادي يسافرو ويتدربو مع باقي اللعابا اللي تم الاستدعاء ديالهم فاللائحة النهائية وغادي يكون بإمكان وليد الركراكي يغير لعاب فالائحة النهائية بلعاب فلائحة الإنتظار قبل من 24 ساعة على إنطلاق أول ماتش ديال المنتخب فكأس العالم.