خرجات فتسجيل.. بريتني سبيرز عاودات على معاناتها ففترة الوصاية – فيديو

شاركت المغنية الميريكانية بريتني سبيرز ميساج فوكال فيه 22 دقيقة على اليوتيوب، هضرات فيه على المعاناة لي تعرضات ليها في فترة وصاية الأب ديالها عليها ولي استمرت 13 عام.
بريتني سبيرز قالت أن باها كان يتحكم حرفياً بكل شي في حياتها، وهي كانت محرومة من حقها باش تاخد أي قرار وحتى فلوس العروض الغنائية لي كانت كدير كلها كانت كتمشي للجيب ديال باها جيمي سبيرز.
وقالت المغنية الميريكانية أنه في فترة الوصاية ماكانش عندها الحق تسوق طوموبيلتها ولا حتى تهز سوارتها، والباب ديال بيتها خاصو يبقى محلول، ماكانتش عندها الخصوصية، حتى باش تشوف الناس الاخرين ما كانش عندها الحق بلا الأذن ديال الأب ديالها.
بريتني سبيرز اعتبرت أن الأب ديالها ماكانش باغيها تتعالج ويطور الوضع الصحي والنفسي ديالها، وكانت الام ديالها وخوتها شاهدين على الظلم لي تعرضات ليه ولكن ماكانوش كيقدرو يهضرو.
وبخصوص المصحة النفسية، قالت بريتني سيبرز أنها دخلات ليها بزز بضغط من الأب ديالها لي هددها باش يمشي للمحكمة الا ما بغاتش تدخل وكان كيقول ليها غادي نربحك، عندي لمعارف وحتى محامي ما تقدريش ديريه.
وقالت بريتني سبيرز أنها كانت مراقبة، تلفونها كان محضي وحتى هي في الحمام أو كتبدل حوايجها كان فريق مقابلها.