الجدارمية حصلوا جيت سكي خارج من ميناء الحسيمة وغادي لاسبانيا

الهجرة السرية رجعات عاود إلى الريف، وتحديدا من سواحل الحسيمة. مصادر محلية هضرات معاها "كود" قالت كشفت باللي هاد الظاهرة رجعات بقوة خلال الأيام الماضية، وكاين اللي تمكن من المرور للضفة الأخرى وكاين اللي حصل.
عصر اليوم الخميس ضبطت عناصر تابعة للدرك الملكي حصلات "جيت سكي" فيه حراكة كانوا غاديين من ميناء الحسيمة في اتجاه إسبانيا. مصادر من تما هضرات معاها "كود" قالت باللي تم توقيفهم واقتيادهم إلى المصلحة للبحث معهم، فيما أحيلت داك الدراجة المائية على المحجز البلدي رهن إشارة العدالة.
البارح الأربعاء كانت شي فلوكة فيها اكثر من 30 واحد كانت غادي تخرج من الحسيمة في اتجاه الضفة الأخرى. الجدارمية ولامارين حتى هوما حاضيين الشادة و الفادة وكاين اللي كيهرب مرة مرة وكيقدر يتشد فالصبليون.