فضايح ماتش البارصا واشبيلية وشوهتنا فالصبليون. طواليط بلا ما وطوبيسات ما تحركو غير بزز وجمهور نقز لكرياج =فيديو=

شوفو لفضيحة كيف دايرة. خلاو الدراري ينقزو لملعب طنجة باش يشوفو البارصا وشبيلية
Publiée par GOUD sur Dimanche 12 août 2018
الماتش اللي كاين دابا بين البارصا واشبيلية ديال “سوبر كوب” الاسباني فضيحة لينا. اش دانا نديرو ماتشات بحال هادو. احد الحاضرين وصف ل”كود” المشهد الفضائحي “شريت بييي ب500 درهم وتسخسخت بزاف باش ندخل. حطيت الطونوبيلة وفرحنا لقينا طوبيسات الزا جايين من مراكش تهز الجمهور٬ غير هما ما تحركوش وكانو عائلات من اسبانيا ومن المغرب وتسخسخنا عاد تعطى الامر باش تتحرك” حسب شهادة هاد المتفرج ل”كود” فكاين اللي ضرب 5 كيلومتر باش يدخل للتيران
الدخلة فضيحة اخرى. التسخسيخ والعذاب “انا عندي تذكرة ديال 500 درهم وصاحبي عندو ديال 900 درهم وبحال بحال. دخلنا ما كاينش الفرق. بجوج تسخسخنا”. فهاد الوقت نقز عدد من الشباب وفيهم اطفال لكرياج ودخلو للتيران بزز كلشي كيشوف فيهم كيف كيبان فهاد الفيديو اللي نشراتو “كود”.
فالداخل وقبل نص ساعة من الماتش “كان الما سالى، الما اللي كيبيعوه كولو سالى. ممنوع ندخلو الما وباش دخلنا ما لقيناش والصهد” يحكي شاهد “كود”. لفضيحة باش تكمل هو الطواليتات اللي دخلو فيها ما لقاو ش فيها الما. فضايح كثيرة غادية تشوهنا بزاف فالصحافة الاسبانية. قراو غير شهادات اللي حضرو باش تعرفو هاد الشي