ها تاريخ تنصيب العميدة الجديدة ديال كلية سطات ومسامر الميدة كيوجدو يديرو العصا فالرويدة وبداوها بالامتحانات

كشفات مصادر "گود" بأن الدكتورة حسنة كجي عميدة كلية العلوم القانونية والاقتصادية بسطات اللي تعينات مؤخراً فهاد البوسط، من بعد الفضايح اللي عاشتها المؤسسة غادي تنصب نهار الخميس 16 يونيو فمركز الندوات اللي كاين فالدخلة ديال الجامعة.
هاد حفل التنصيب حسب مصادر "گود" غادي يحضر فيه العامل ديال الإقليم والمنتخبين والناس دياول الجامعة وأصدقاء العميدة.
هادشي مزيان ولكن المصدر ديالنا من داخل لافاك أكد على أن مجموعة من مسامر الميدة يعتبرون نقابيين، غير منهم شي وحدين ماشي كاملين، بغاو يبداو يديرو العصا فالرويدة من خلال العرقلة ديال الإمتحانات وشي حويجات آخرين كيحاولو يروجها ليها باش التجربة ديال العميدة ماتنجحش من البدية ولكن المرا باينة عندها رؤية ديال الإصلاح وإعادة بريق الكلية.