القضية مرونة عند حزب الاستقلال فالشمال قبل المؤتمر الوطني.. "گود" جابت تفاصيل الكولسة

نايضة مگارعة فالشمال بين أتباع الفاسي وأتباع ولد الرشيد داخل حزب الاستقلال، هاد المگارعة تللي كيبان انها غادي تخبط الحزب مع الحايط شي خبطة اللي موحال واش يبقى ينوض منها.
مصدر ديال "گود" أكد على انو البرلمانيين الاستقلاليين ديال جهة طنجة تطوان الحسيمة مقدروش يجيبو دعم أعضاء اللجنة المركزية وگاع المفتشين ديال الحزب فالجهة باش يبقاو واخا غير أعضاء بالصفة فالمجلس الوطني.
وهاد الشي كيقول مصدر "گود" بللي راه خلق مشاكل ما بين البرلمانيين من واحد الجهة وما بين القيادة ديال حزب الإستقلال من جهة أخرى.
اللجنة التنفيذية ديال الحزب اللي كيرأسها الأمين العام والوزير نزار بركة كانت صوتت بالإجماع على مقترحات تعديل النظام الاساسي ف"الخلوة" اللي داروها مؤخراً فالهرهورة قبلما يلجؤو للبرلمانيين باش يلغيو هاد المقترحات.
وفي هذا السياق حصلات "گود" على معطيات من داخل الحزب كتفيد بعقد لقاء هادي يومين في دار المستشار محمد بولعيش اللي جا غير مؤخرا للحزب من حزب الأصالة والمعاصرة بطنجة، وكان لي جابو هو الأمين العام نزار بركة لي كان كيسهر بشكل شخصي على هاد اللقاء ولي قاطعوه الناس دياول اللجنة المركزية والمفتشين ديال الحزب بجهة الشمال.
وكيستعد أعضاء اللجنة التنفيذية بالجهة باش يواجهو ما هاد الشي لي سماوه إنقلاب على القوانين ديال الحزب والمؤسسات ديالو وعلى قرارات القيادة ديال الحزب.
التفاصيل اللي عند "گود" كتقول بلي كاينة دعوة باش يدار لقاء حزبي كبير فالجهة غادي يحضرو ليه گاع المسؤولين ديال الحزب بهياكله والتنظيمات الموازية المختلفة.