بحال شي فيلم.. بيلوط غيب فالسما وراجل مسافر عتق الطيارة وهبط بيها طرونكيل – فيديو

قدر مسافر وسط طيارة خاصة صغيرة باش يهبطها في فلوريدا من بعدما سخف البيلوط وطاح فوق من الطابلو ديال التحكم، وهادشي اللي غير الديريكسيون ديال فين كانت غادة الطيارة.
والهبوط وقع فمطار "بالم بيتش" الدولي بمساعدة مراقبي الحركة الجوية، حسب "WPBF-TV".
الراجل اللي نزل بالطيارة "Cessna Caravan" ماكيعرفش أصلا يصوكَها ولكن قدر يتبع إرشادات المراقبين ديال الحركة الجوية على حساب ما نشرو جورنال "The Times" البريطاني.
المسافر دار نداء استغاثة لمركز المراقبة وخبرهم بللي ماعارفش كيفاش يتحكم فالطيارة ولكن حافض على الهدوء ديالو وحاول يتبع مزيان التعليمات ديال الناس في أبراج المراقبة.
وطالبو منو المراقبين باش ينزل في الارتفاع ووراوه كيفاش يتحكم في الطيارة ويدور بيها حتى نزل بطريقة صحيحة وآمنة وبلا مشاكل.