فيديو صادم من الشينوا.. موظفين لقاو شيباني مزال حي كانو غاديين بيه للاموركَ

شركة ديال تنظيم الكَنازات فمدينة شنكَهاي فالشينوا فرحات بالخدمة اللي داروها جوج من موظفيها وعطات لكل واحد منهم پريم ديال 600 جنيه إسترليني، بعدما اكتاشفو جثة شيباني كانت مازال حية وسط لاموركَ.
جورنال "The Times" البريطاني قال أن الراجل عندو 75 عام وكان كيعيش ف"دار لرعاية الشيبانيين"، وهزوه للاموركَ على أساس أنه مات بسباب مضاعفات إصابتو بفيروس كورونا (متحور أوميكرون)، لكن الخدامة ديال الترانسبور، اللي تكلفو باش يهزوه من دار الرعاية، اكتاشفو أن الشيباني مازال حي.
الفيديو اللي انتاشر تصور من قدام باب لاموركَ بعدما كانو الخدامة كينزلوه من لومبيلونص.
وهاد الحدث نوض الروينة وسط الرأي العام فالشينوا، لأن الناس اعتابروه خطأ جسيم خصوصا في مدينة كبيرة بحال شنكَهاي، وخاصو مايدوزش بدون محاسبة ويتعاقب كل من ثبتات مسؤوليتو فالغلط اللي وقع، واللي كان غيتسبب فدفن السيد وهو مزال حي.