فضيحة جديدة فجامعة سطات.. منسق ماستر المعاملات الالكترونية كحلها: متابع فملف تزوير للسطو على عقارات الاجانب

كيبان ان هاد الفضايح في سطات ماغاداش تسالي وديما مربوطة بهاد الجامعة ديال الحسن الاول، ها التزوير في النقط ها الجنس مقابل النجاح هاد الفلوس مقابل النقط هاد المرة طاح واحد الاستاذ اخر والمصيبة داير الجمع بين الوظيفتين لي معندوش فيها الحق.
(ن.ن) هو استاذ ديال القانون الخاص بكلية العلوم القانونية والسياسية بسطات ومنسق ماستر المعاملات الالكترونية لي ناض فيه شلا تخلويض قبل ما يتسد، الماستر لي قالو مجموعة من الناس ل"گود" انه كانت فيه المحسوبية والزبونية ومنساوش انه هو الماستر لي خرج لينا مستشار الجماعي لي كيهرس الطوابل في دورة للمجلس الجماعي بسطات.
ما علينا هاد أستاذ جامعي ومحامي في نفس الوقت، قام بالسطو وهو ومسيري فضاء "ميكسيكو" الشهير في سطات على مبنى تابع للخيرية الاسلامية في سطات وزور توقيعات على مواطن مدخلش للمغرب هادي 12 عام.
تحقيقات الفرقة الوطنية للشرطة القضائية بالدار البيضاء توصلات لان هاد الأستاذ راه داخل في مافيا دولية ديال السطو على العقارات وغسيل الاموال.
ووضح التحقيق لي دارو قسم مكافحة الجريمة الاقتصادية والمالية بالشرطة القضائية أن الأستاذ الجامعي (ن. ن) شارك في عملية السطو على عقارين في ملك أجانب فرنسيين بسطات عن طريق عملية بيع صورية مقابل 200 مليون سنتيم وتزوير وثائق واستعمالها وانتحال صفة.
وكترجع تفاصيل القضية، حسب تحقيق الشرطة القضائية، إلى 1965/07/22، مني ناض واحد المواطن فرنسي كانت سميتو قيد حياته "غاديو أوغستان" حق الانتفاع من عائدات الأكرية لكافة المجموعة العقارية التي هي في ملكه ذات الرسم العقاري عدد: 2288/5 لفائدة الشركة الخيرية الإسلامية بسطات، وحسب عقد الانتفاع تمت المصادقة عليه بتاريخ: 1965/07/22، قبل ما يموت هاد أوغستان بتاريخ 1967/09/27.
وكشف التحقيق أن المسمى المحامي (ن. ن)، رغم علمه أن المسمى (خ. ح) لم يتردد على أرض الوطن منذ شهر دجنبر 2016، ناول للمسميين (أ. د) و(ع. ج) عقد البيع دون تضمين اسم وصفة هذا الأخير بها، وبعد المصادقة عليها ببلدية سطات، ناولهما للمحامي المذكور لمباشرة إجراءات انتقال الملكية بالمحافظة العقارية بسطات، وهو من قام بإيداعهما بهده المصلحة.
هاد الملف خانز بزاف وخص هاد المحامي الاستاذ اوقف عند حدوا ،كما ان وزير التعليم العالي والبحث العلمي والابتكار عبد اللطيف الميراوي خصو يفتح واحد البحث في المستفيدين من ذاك الماستر ديالو ديال المعاملات الالكترونية لانه كانت معاملات نييت .