سكوب. فضيحة جديدة لزعيترات. جر شاب من ودنو فالشارع بعد ما وقفو وقال ليه: "ما كتخافش من ناس سيدنا" وما خلاه يمشي حتى فرض ليه يقول ليه سمح لي

الاحد 10 ابريل مع الوحدة تقريبا وقع حدث كتضرب صورة لبلاد كلها. عنتيرات جديدة ديال الزعيترات فكازا. فهاد الوقت وبالضبط فشارع بوركون فلهجاجمة كان الشاب ع. فطونوبيلتو سيتروين مع صاحبو وفق ما حكاه ل"كود" احد افراد العائلة.
مصدر "كود" قال باللي الشاب شاف بورش داز بلا احترام اسبقية ليمن. هدر مع مول هاد الطونوبيلة بالاشارة كيف كيوقع فهاد الامور٬ ما عرف باش تبلى حتى جا قدامو وبلوكاه٬ يضيف مصدر "كود".
هبط مول بورش واكتاشفو انو هو عثمان ابو زعيتر يشرح مصدر "كود". وقاحة هاد مول السوابق بحال خوتو. سوابق دارهم فالمانيا مشات بعيد. "شدو من وذنو وجبدو منها" يشرح مصدر "كود" باسى وحگرة واضاف وقال "ما كتخافش من ناس سيدنا". اييه قالها بوقاحة. باش صاحبو بغى يقول ليه باللي ماشي من حقو يهبط ويحبسو. خرج شي حد من الميرسيديس اللي كانت مع البورش. قال للدراري ايلى بغيتو تمشيو طلبو السماحة.
الدري الصغير مصدوم محگور وسمع كلمة "سيدنا" طلب السماحة يشرح مصدر "كود".
دابا هاد مول السوابق هادي ايام حط طونوبيلتو البورش ديكابوطابل حدا موروكو مول وداوها ليه للفوريان البوليس. كيفاش خرجات. واش هادا فوق القانون
شكون عطاه الحق يهدر باسم سيدنا. كيفاش يتعدى على المواطنين. شكون يوقف فضايح الزعيترات.