الناس خايفين من شي ضربة مجهدة فالأيام الجاية.. جوج هزات أرضية حسو بيهم سكان إقليم الدريوش

تسجلات اليوم الإثنين حوالي الساعة الثانية صباحا، جوج هزات أرضية، ضربات سواحل الدريوش، حسو بيهم ساكنة الإقليم.
وحسب ما علن عليه المرصد الأوروبي لمراقبة الزلازل، فالهزة الأولى تسجلات فساعة الواحدة و34 دقيقة ديال الصباح، وصلات القوة ديالها 2.3 بمقياس ريشتر، والثانية على الساعة الوحدة و52 دقيقة، بقوة 3.3 على سلم ريشتر.
وحسب المرصد الأوروبي، البؤرة فين ضرب الزلزال بعيدة على اليابسة ب30 كيلومتر تقريبا، الشي اللي خلا ساكنة الإقليم تحس بها، خصوصا الجماعات القريبة من الساحل.
المركز الأوروبي لرصد الزلازل، أكد على أن هاد السيمانة تسجلات تقريبا 100 هزة، أخرها كانت يوم البارح الأحد، مع الساعة 2 و34 دقيقة ديال الصباح، بقوة 3.5 على سلم ريشتر.
وفتصريح خاص ب"كَود"، أكدو متتبعين للشأن المحلي، بللي هاد الهزات المتتالية فإقليم الدريوش والنواحي، اللي ضربات هاد السيمانة، خلات أثر فسكان المنطقة، اللي ولاو خايفين توقع شي ضربة كبيرة، نظرا لأن المنطقة معروفة بزلازل، فإشارة منهم للكارثة اللي وقعات فمدينة الحسيمة فعام 2004.