سانشيث غادي يوصل غدا فالعشية ويتلاقى مع الملك ويفطر معاه والجمعة يشوف رئيس الحكومة ويرجع لبلادو وها اللي جايب معاه

رئيس الحكومة الاسبانية بيدرو سانشيت غادي يوصل للرباط غدا فالعشية وفق مصادر "كود" فزيارة غادية تدخل لتاريخ العلاقات بين الدولتين. وفق مصادر "كود" غادي يكون معاه فالحكومة وزير الداخلية مارلاسكا ووزير الخارجية الباريس بالاضافة الى وفد اعلامي كبير ومدراء بعض المؤسسات العمومية خاصة فقطاعي الفلاحة والصيد البحري.
وفق ما عملته "كو"د فباش غادي يوصل غادي يمشي للقصر الملكي وغادي يتلاقى مع الملك محمد السادس. بعدها غادي يدير ليه فطور فالقصر الملكي نيت. عراضة ملكية وفطور ماشي بعدد كبير من الناس. خاص احترام تدابير احترازية بسباب كورونا.
من بعد يمشي يرتاح وفالغد غادي يتلاقى مع رئيس الحكومة قبل ما يركب الطيارة ويرجع لبلادو.
الحدود البحرية والبرية بين المغرب وسبتة ومليلية بالاضافة الى العلاقات الثنائية فكاع القطاعات غادية تكون فالطاولة. اكيد ان الاعتراف بمغربية الصحرا غادي يكون ليها مقابل. رئيس حكومة اسبانيا محتاج ياخد مقابل فهاد الزيارة. سبتة ومليلية كتخنق نهار على نهار. خاص فتح الحدود