ديبلوماسي سابق ل"كود": قرار مدريد غادي يزلزل الجزائر ولعمامرة غادي يخلص الثمن واتوقع انقسام فالجيش

توقع ديبلوماسي مغربي سابق فتصريحات ل"كود" ان هاد القرار التاريخي اللي خداتو الحكومة الاسبانية نهار الجمعة 18 مارس 2022 غادي يزلزل الجارة الشرقية.
استدعاء سفير الجزائر من مدريد احتجاجا على هاد القرار وادعاء ان حكومة سانشيت ما خبراتش الجزائر واللي طلع فاللخر كذوب. الصبليون قالو باللي خبرو حكام الجارة٬ كل هاد لشي عتابرو مصدر "كود" "اختراق كبير" وفضيحة اكبر.
المصدر قال "كود" باللي من نتائج هاد الحدث "اتوقع انقسامات فالجيش اللي حاكم فالجزائر" كما توقع ان يكون كبش الفداء فهاد "الاختراق" هو التضحية بوزير الخارجية رمطان لعمامرة.
السبب هو ان لا الخارجية ولا مخابرات الجيش ولا مؤسسات الدولة الجزائرية دارت خدمتها وعرفات هاد الشي حتى تنشر. هادا فحد ذاتو غادي يخلق انقسام فالجيش وغاديين يضحيو بعدد من المسؤوليين واتوقع يكون لعمامرة اولهم٬ يضيف مصدر "كود".