كازا.. بنت الفشوش تسببات ف كسيدة خيابة والضحية لاحوه ف السبيطار لا حنين لا رحيم

أكثر من أسبوع باش تسببات بنت فشوش في كسيدة معا مول موطور عندو 25 عام في كازا، هزوه ديريكت للإنعاش في مستعجلات ابن رشد، والدريا اللي ضرباتو بطوموبيلتها تتقرا الطب، داوها الكوميسارية ديال السيال، بقات فيها شي شويا، وخرجات وفق مصادر "كود".
الخطير أن هاد السيدة ولا عائلتها ما تسوقوش للضحية، اللي تزادت عليه الحالة وبقا كوما من تاريخ 23 أكتوبر ملي ضرباتو حدا ملتقى شارع سيدي عبد الرحمان وابن سينا في الحي الحسني، وحتى البلوليس ماعاودش طلوا على الضحية، اللي ماعندو لا حنين لا رحيم ومغيب، وخاصو فلوس باش يدير السكانيرات والدوا وغير ذلك.
دبا مصادر أكدات ل"كود" بلي الحالة ديالو تدهورات ويمكن يموت في أي لحظة، نتيجة الكسور والجروح لي فراسو، وهزوه حطوه في الجناح 33، وحتى الطبا تيقولو سويرتي مسكين يفيق منها.
حتى المعاينة ما دارتش لحالتو وبنت الفشوش اللي سببات ليه هاد الكارثة، وهي تتقرا الطب في آخر سنة ليها، وقريب ليها السبيطار، كون غير مشات تشوفو من الأول وتساعدو إنسانيا، ولكن دارت بحال داك المثل اللي تيقول "لا عين شافت ولا قلب وجع".