لخميس اللي فات قررات الحكومة فرض "الباسبور ڤاكسينال". دارتو بلا مقدمات. كانت كارثة فتسويق قرار داروه دول غربية كثيرة. قرار ما رافقاتوش قرارات اخرى بحال تمديد فتح المقاهي والمطاعم فوق من لحداش دالليل. لكن واش فكازا؟ اكثر مدينة فالمغرب هاد القرار تم احترامو؟ "كود" دارت دويرة البارح واليوم فقهاوي فمطاعم فسناكات فمخبرات فسوبيريت فمحلات تجارية فوكالات بنكية. فالمغرب كاينة "اجبارية" الكمامة ولكن دابا ولى اللي دارها كيبان فشي شكل. ما كاين حتى حد كيحتارم هاد القرار ديال الاجبارية. نفس الشيء بالنسبة لهاد القرار الجديد. "كود" مشات كيف قلنا لعشرة لبلايص البارح واليوم فالصباح وغير بلاصة وحدة اللي طلبات تشوف الباس ڤاكسان. بلاصة وحدة للي هي وكالة بنكية فشارع مولاي يوسف. السيكوريتي كيطلب توريه هاداك الباس وكتدخل. الكمامة ماشي اجبارية فهاد الوكالة. طبعا حسب مستخدم فالبنكة ل"كود" فبلايص اخراين فاحياء اخرى ما كيطلبوش هاد الباس ڤاكسينال". واضاف ان هاد الوكالة كتطلبها حقاش قريبة من الادارة العامة وصافي اللي كاينة فتقاطع مولاي يوسف زنقة الجزائر. لقهاوي حتى حد ما كيطلبها. لا اللي فشارع عبد اللطيف بنقدور ولا للي فشارع السجلماسي ولا اللي كاينات فالزرقطوني او فالحسن الثاني او الراشدي. بلا ما نهدرو على قهاوي بن تاشفين. فهاد لقهاوي فيها الشعبي واللي كيجيوها طبقة متوسطة بحال اللي كاينة فعبد اللطيف بنقدور قريبة من "ڤيلودروم"٬ لكليان ما دايرش حتى لكمايم. فهادي ممكن تلاقى مع مدراء مؤسسات خاصة معروفة واطر فهاد المؤسسات وكلهم لا كمايم ومول القهوة ما كيطلب لا باس لا سيدي بوزكري. نفس القصة كتكرر فسوبيريت وفالمتاجر ديال الماكلة والشراب بكل انواعو العادي والروحي. "كود" دخلات هاد المتاجر. ما سول حتى شي حد على الباس. فكازا تدخل فين بغيتي باش تاكل من المطاعم والسناكات اللي زارتهم "كود" البارح واليوم٬ فيهم مطعم ايطالي فحي راسين وكوتيي ومول سندويتشات فشارع بودرو واخر حدا لبرانس... ما كيسولك حد لا على لكمامة لا على الباس ڤاكسينال. اللي دار شي دويرة فكازا غادي يعرف باللي هاد اجبارية الباس ڤاكسينال مغربي بامتياز. اي القرار كاين ولكن قليل بزاف اللي كيطبقو.
