بعدما نصبات على كليان ديالها ومنهم شركات كبار وضربات فلوس صحيحة.. 4 سنين ونص حبس وغرامة ديال 3 مليار لموثقة ف كازا

فالوقت اللي القانون عطى للموثقين هوما اللي يحميو المواطنين من النصب والاحتيال، رجعو عدد من الموثقين هوما النصابة الحقيقيين.
ابتدائية البيضاء حكمات على موثقة ب4 سنين ديال الحبس، بعدما اختالسات فلوس الكليان ديالها، وضربات ليهم الملاير، ولكن المتهمة قالت فمحاكمتها أنها ماسرقاتهومش، وأنه فقط بسباب أزمة "كوفيد-19" وارتفاع مصاريف مكتبها اللي فيه 14 دالموظفين، خلاها تحول أموال الزبناء من حساب صندوق الإيداع والتدبير، إلى حساب مكتبها وليس حسابها الشخصي.
وزادت أنه بسباب استقالة المحاسبة وقع ليه خلط فالمصاريف وأموال الزبناء وفكات مشاكلها المادية بفلوسهوم، ولكن المحكمة ماقتانعاتش بالهضرة ديالها، خصوصا وأن السيدة طاحنة الملاير ماشي شي فلوس قليلة.
وحكمات المحكمة على المتهمة إلى جانب الحبس، بتعويض شركة "وفا إيموبيليي" بمليار و338 مليون سنتيم، وتعويض الشركة العامة المغربية للأبناك ب709 مليون سنتيم، وتعويض شركة "سهام" ب814 مليون سنتيم، زيادة على تعويضات لنفس الشركات ولأشخاص متضررين بلغت 450 مليون سنتيم.
وقال مصدر خاص ل"كَود"، أن الضحايا تعرضوا لنصب كبير، بعدما تاقو فالموثقة وخذاو كريديات باش يشريو ديور وصدقو منصوب عليهم، وأن أحدهم حاليا كيخلص 3 د الملاين شهريا فالكريدي اللي كان خدا.