CIH جابت الحل.. هاشنو خصك تدير باش ترجع فلوسك اللي تشفرو من الكونط

خرجات البانكا ديال CIH ببلاغ كتوضح فيه الطريقة اللي كيخص الزبناء يتبعوها باش يرجعو ليهم فلوسهم، بعدما تشفرو ليهم من الكونط بسبب ليهاكرز.
البلاغ اللي نشراتو البانكا فالصفحة السمية ديالها ففيسبوك قالت فيه انها تلقات مجموعة من الشكايات، وهكذا البانكة بلوكات الموقع المستهدف، ومن بعد توصلات بللي هذي عملية ديال اختلاسات لبيانات البطائق من مواقع وهمية همت البطائق التابعة لبنوك مختلفة وبزاف ديال الدول.
ويمكن للمتضررين يقدمو شكايتهم عبر مركز الزبناء 4747، وغادي يتوصلو بتعويض إجمالي لكَاع الفلوس اللي ضاعت ليهم.
وطالبات البانكا من زبناءها باش يديزاكتيفيو خاصية "إي كوميرس" فالكونطات ديالهم من لابليكاسيون وموقع البنكة.
وسبق ل"كود" تواصلات مع مسؤول فالبنك شرح ليها المشكل اللي وقع، وأن ديهاكرز هوما مالين الفعلة، وأنهم استهدفو الناس اللي كيشريو من الأنترنت، وقال ان الامور دابا تحت السيطرة.