الصبليون كاعيين. فالوقت اللي الداخلية الإسبانية عرضات عليه 90 كواد ف إطار محاربة الحريكَ.. المغرب ماتسوقش وماردش عليهم

قالت صحيفة "أوكي دياريو" الإسبانية، أن وزارة الداخلية المغربية، ماتسوقاتش لنظيرتها الإسبانية اللي صيفطات ليها باش تختار نوعية الكواد اللي باغياهم باش تشري ليها 90 كواد تعطيهم ليها.
وزادت الصحيفة أن الداخلية الإسبانية صيفطات للمغاربة وبقات كتتسنى شهرين باش يردو عليها ويقولو أشمن نوع بغاو باش تشريهم، ولكن المغاربة ماجاوبوش كَاع وماتسوقوش.
صحيفة "أوكي دياريو" عتابرات هادشي احتقار من المغاربة للكادو اللي كيعطيوهوم الصبليون، وأن هادشي بسباب أزمة دخول زعيم البوليساريو، ابراهيم غالي، لإسبانيا في وقت سابق.
وزادت الصحيفة أن هاد المساعدة الإسبانية، كاتجي فإطار التعهد اللي داروه الصبليون بدعم المغرب ب30 مليون أورو ديال المعدات، وبالفعل شراو ليه مئات من طوموبيلات 4×4، وقوارب وبزاف دالمعدات المتطورة الأخرى.
https://okdiario.com/espana/rabat-desprecio-90-quads-14-millones-que-sanchez-quiso-regalar-apagar-crisis-ceuta-7858182