علمت "كود" ان شي مستشار فمجلس مقاطعة عين السبع بالدار البيضاء ديال الحركة الشعبية مهرب عدد من المرشحين ففيرما كاينة فدوار عين لقصر ببنسليمان. وحسب مصدر "كود" فان شكاية وضعت ضده فهاد الاتجاه من قبل احد الاحزاب المشكلة للتحالف المتفق عليه. وكانت احزاب التجمع الوطني للاحرار والاصالة والمعاصرة والاتحاد الدستوري اتافقو علي توزيع رئاسة مجالس مقاطعات روش نوار وعين السبع و الحي المحمدي كما يلي: البام ياخد الحي المحمدي وصحاب العود ياخدو روش نوار ويخليو للاحرار عين السبع. كما تم الاتفاق وفق مصدر حزبي ل"كود" باش يكون المرشح=المرشحة= لمنصب رئيسة مجلس مقاطعة عين السبع وكيلة لائحة التجمع الدكتورة نكوط اللي وقع هو تم التصويت على رئيسي مقاطعتي الحي المحمدي وروش نوار ووقعات مشاكل فعين السبع. بدية هاد السيمانا دارت انتخابات وناضت روينة فيها وسخفات شي وحدة وتخربق التسيير وكان الطايح كثر من النايض وكلشي تأجل. وفق مصدر حزبي ل"كود" فان شخصا يدعى حسيسينا من الحركة الشعبية "هرب" الاغلبية خارج هاد الاتفاق الثلاثي ودا 2 من الاتحاد الدستوري وشي 4 ديال البام بالاضافة الى 3 ديال الحركة الشعبية وشي وحدة من البي جي دي. دابا الشكاية تحطات وممكن الجدارمية يقرقبو على هادو فاية لحظة. وكان التجمع الوطني للاحرار جاب 8 فعين السبع والبام جاب 4 والاتحاد الدستوري جاب 2 فيما الحركة جابت 3. ويتوقع ان يعاد تنظيم انتخابات رئيسة المقاطعة بعد غدا الاحد 3 اكتوبر. كان المقاطعة كان رئيسها هو التجمعي بنعمر اللي كثرو فضايحو حتى هو ورجع اللاور.
