حلفاء الحكومة گاليك. الاستقلالي القادري للي جاب 5 قولب الاحرار اللي جاب 14 ولحمامة غادية دير طعن. قال ليهم خليو برشيد لعائلتي ونعطيكم النائب الاول وباش جا التصويت ها اش دار

اليوم تم التصويت على مكتب المجلس البلدي لبرشيد. التصويت جا بعد شد لي نقطع ليك. بعد ما تهربو مستشارين لمراكش من قبل آل القادري.
فاللول كان اتفاق باش الاحرار ياخدو الجماعة حقاش جابو 14 صوت فيما الاستقلال يالله جابو 5 فقط. طمعو حقاش الاستقلال هز مستشاري باقي الاحزاب وداهم لمراكش. فيهم صحاب البام والاتحاد الاشتراكي والاتحاد الدستوري وشي احزاب اخرى.
ناض الصداع وبقى ينوعر فؤاد القادري عضو اللجنة التنفيذية لحزب الاستقلال. كان باغي جهة الدار البيضاء. باش مشات ليه٬ حلف لا تفاك مع برشيد.
ناض دار ميثاق شرف بين هاد القادري وبين محمد بوسعيد المسؤول الجهوي عن الاحرا فجهة كازا. فيه ان الاستقلال ياخدو رئاسة البلدية وتسند النيابة الاولى لحزب التجمع الوطني للاحرار لشي مستشارة ديالهم.
باش جا التصويت القادري اللي وجد الجماعة لخوه وعائلتو للي ترشحو فهاد المنطقة٬ تخلى على "ميثاق الشرف". بغى يعطيهم النيابة الثالثة. باش رفضو دارت انتخابات وعطاهم النيابة الثانية واخا المرشحة انسحبات.
دابا وفق مصدر تجمعي ل"كود"٬ غادي الحزب يدير طعن فهاد الانتخابات وغادية طيح كلها.