من بعد "كاسا دي بابيل" وضجيجها.. مسلسل كوري داير روينة هاد ليام ف العالم وف المغرب.. كيهضر على ناس ماعندهمش فلوس غايلعبو "لعبة الموت والحياة"

قدر المسلسل الكوري "squid game" اي لعبة الحياة والموت يحقق واحد النجاح كبير وشهرة و تفاعل مع الجمهور من نهار تلاح ف "نتفليكس" بحيث هو اللول حاليا على قائمة المشاهدة فبزاف ديال الدول منها المغرب.
المسلسل فيه تسعود ديال الحلقات كيهضر على واحد المجموعة ديال الناس لي معندهمش الفلوس، وغادي تجيهم واحد الدعوة غريبة باش يلعبوا فمجموعة ديال الالعاب، لي يقدرو من خلالها يربحوا بزاف ديال الفلوس تقدر تبدل ليهم حياتهم. وغادي يقبلوا بالدعوة، ولكن مكانش فراسهم بلي هاذي مخاطرة كبيرة وتقدر تكلفهم حياتهم.
الاحداث فالمسلسل كتطور بالزربة وكتولي مشوقة أكثر وأكثر، بحيث البطل المشهور جونگ جاي المكافح غادي يغامر بحياتوا باش يربح الجائزة.
والمسلسل من تاليف وإخراج هوانگ دونگ هيوك.
حسب ما كيقول الجمهور، كاين الجزء الثاني، وهادشي لي خلا المخرج يرد بلي مكاين حتى خطة دابا على انه يكون موسم واحد اخر، لانه الا كان، غادي يحتاجوا ايمكانيات كبيرة كثر من لولا.
هادالمسلسل عجب بزاف المغاربة وخلاهم كيهضرو عليه فمواقع التواصل الاجتماعي، يمكن حيث شافو راسهم فالابطال لي معندهش الفلوس وغادي يديرو المستحيل باش يصبحوا لباس عليهم ويعيشوا حياة الرفاهية.