من بعد انتقادات كثيرة.. زوكربوركَ وقف "أنستكَرام" الخاص بالدراري الصغار

من بعد الصداع الكبير اللي ناض على مارك زوكربوركَ مول "فايسبوك"، قرر هاد الأخير يستغنى حاليا على فكرة "أنستكَرام" ديال الدراري الصغار (Instagram Kids).
هاد القرار اللي خداتو شركة "فايسبوك" جا بعدما دارت "وول ستريت جورنال" تقرير كشفات فيه على التأثير اللي كيديرو "أنستكَرام" على المراهقين.
وقالت شركة "فاسيبوك"، اللي تابع ليها "أنستكَرام"، أنها بغات دير كونط خاص بالدراري اللي قل من 13 عام حيت بزاف منهم كيبدلو السن ديالهم الحقيقي.
دراسات قديمة دارتها "فايسبوك" أكدات أن "أنستكَرام" كيخرج على الدراري وكيخليهم ماياكلوش مزيان وكيدوزو سوايع كثيرة كيتفرجو في ستوريات وغيرها، وهكذا كيتطور عندهم نوع من الإدمان اللي كيزيد يخليهم معزولين على حياتهم العائلية و الاجتماعية العادية.