دنيا باطمة كتوجد باش تخوي المغرب وقالت: قلبي كيبغي سكت ملي كنعرف شخصيات كبيرة متبعاني

المغنية دنيا باطمة رجعات كدير السنابات واللايفات في انستكرام بزاف، من نهار تشد مول كونط “حمزة مون بيبي” وخرجو الاشاعات انها تشدات في الحبس وانها من العصابة ديالو في التشهير والابتزاز. هاد الرجوع القوي هو باش تأكد انها ماشي في الحبس وماعندها علاقة بالهضرة الكثيرة لي كتضور صباح مساء في الصفحات.
البارح بالليل دارت ستوريات في سناب شات قالت فيهم انها غادي تخوي المغرب وترجع للبحرين بعدما دوزات وقت طويل في بلادها وقالت انها كتقدا باش تدي الملح والعطرية والتحميرة واتاي حيت العطرية ديال البحرين مختلفة، ودوات حتى على الفطور بالمسمن وشلا مواضيع.
وقالت باطمة ان قلبها كيبغي يسكت ملي كتعرف بلي شخصيات كبيرة متبعينها في سناب شات وانستكرام، واضافت: “كنقول هانارب ياكما قفرتها شي نهار وقلت كلام ماكاينش. ولكن في الاخير كنقول الهضرة ديال جميع المغاربة ماكنقفرهاش”.