العافية فالشاون مازال شاعلة.. والسكان والبومبية مانعسوش باش يمنعو الحريق يوصل للديور – تصاور وفيديو

واخا قدرو السلطات الإقليمية يسيطرو على العافية اللي شعلات لبارح فالعشية فغابات جبل سونة، باعتماد جوج من طائرات الكانيدير، الحرائق زحفات لبارح بالليل لمنطقة خرى فالجبل، وبدات كتكبر شوية بشوية حتى قضات على مساحات كبيرة من الغطاء النباتي الغابوي.
https://fb.watch/7ozLOcnN2_/
عناصر من فرق التدخل وصحاب الوقاية المدنية كانو حاضرين بالليل باش يحاولو يطفيو العافية، وخا صعاب عليهم يعتمدو طائرات الكانيدير فالليل والظلام، وبقاو كيتسناو حتى للصباح باش يستعملوها.
وما كان على رجال الوقاية المدنية، بتعاون مع بعض الساكنة اللي باتو سهرانين باش ينقذو منطقتهم، غير يحاصرو زحف ألسنة اللهب باش ماتنتشرش فمناطق غابوية أوسع، وتوصل لبيوت المواطنين.
لبارح فالعشية، استطعو فرق التدخل باش يطفيو العافية اللي شعلات فالشاون، باعتماد طيارات الكنادير، والشاحنات الصهريجية.
وباشرات السلطات الإقليمية تحرياتها حول ملابسات هذ الحرائق، اللي مازال مامعروفة أسبابها لحد الساعة.
وتزامنات هذ الحرائق مع حرائق أخرى اندلعات فمنطقة القبايل شمال الجزائر، ولقات السلطات صعوبة فإخمادها، الشي اللي تسبب فموت 71 شخص على الأقل وتلف كيلومترات من الغطاء النباتي الغابوي.