البوكسورا الصبليون كاعيين بسباب خسارتهم فطوكيو ولصقوها فالحكام المغاربة: كانو منحازين لخصومنا وظلمونا

الملاكمين الصبليون دوزو وقت قصير فالألعاب الأولمبية فطوكيو، بحيث تقصاو كاملين من ربع النهائي، وفاش خرجو يبررو الخسارة شارو بأصابع الاتهام للحكام، خصوصا منهم اللي من أصول مغربية.
البوكسور الإسباني كَابرييل إيسكوبار خسر النزال ديالو فربع النهائي، والبوكسور إيمانويل رييز حتى هو طاح فنزالو مع خوليو لاكروز، الخسارة ديال الرياضيين بجوج خلات المحللين يخرجو يتهمو الحكام المغاربة، ويقولو أن تحكيمهم ماكانش عادل.
المحللين الإسبانيين قالو أن الحكمين، مقروني عبد اللطيف والبشير عبار، كانو كيحكمو لصالح الخصمين ديال ليبوكسور الصبليونيين.
وقال مدرب إيسكوبار قال فهذ الصدد "الحكام المغاربة الجوج خسرونا فجميع النزالات، وخبرت الهيئة المنظمة وماخداوش كلامي على محمل الجد، هذو وقحين".
من جهتو اعتبر إيسكوبار، المعروف ب"كَابي" أنه كان واقيلا ضحية الأزمة الديبلوماسية بين المغرب واسبانيا: "ماعرفتش واش بغاو ينتقمو مننا بسباب هذشي، انا بعيد على هذشي وماكنديرش السياسة، ولكن اللي عارف أنني فالجولة الأخيرة درت كلشي باش نربح، ووالو..."، على حساب هضرتو.
https://www.elespanol.com/deportes/juegos-olimpicos/20210803/marruecos-declara-guerra-espana-senalados-decisiones-jjoo/601440768_0.html