النقى مهم فالصيام. رفيقي: الديودورون والريحة ماكيفطروش.. والى هبطات قطرة دالما أو الدونتيفريس للحلق ماشي مشكل

أكد محمد عبد الوهاب رفيقي، الباحث فالدراسات الإسلامية، أن قطرة ديال الما الى نزلات للحلق بسبب المضمضة او حكان السنان بالدونتيفريس ماكتفسدش الصيام، ولا حرج فيها.
رفيقي قال هذشي ففيديو نشرو عبر خاصية الستوري فحسابو على فيسبوك، فصدد كلامو على الصائمين اللي ماكيهتموش بالنظافة ديالهم، بدعوى أن هذشي ممكن يأثر على صيامهم، واضاف"مافهمتش شنو العلاقة بين الصيام واستعمال العطر والديودورون والدونتيفريس، كاين اللي ماكيقطعش حتى ظفارو... واش الإنسان باش يتسمى صايم خاصو يكون موسخ ويشمو فيه الناس ريحة خايبة؟ هذشي راه لا علاقة ليه بأحكام الصيام"، على حساب هضرتو.
وزاد: "الله يجازيكم بيخير خليكم نقيين وزوينين وخليونا نشمو الروائح الزوينة..."