العداءة البيلاروسية اللي خدات اللجوء ف بولونيا عاونها "كَوكَل" باش تهرب من طوكيو – فيديوهات

أكدات العداءة البيلاروسية، "كريستينا تيمانوفسكايا" (Krystsina Tsimanouskaya) أن لاپليكاسيون ديال "كَوكَل تراديكسيون"، سهل عليها عملية الهروب من اليابان إلى بولونيا، من بعد ما رفضات تمشي مع فرقتها لبلادها بكري، وتنهي مشاركتها فدورة الألعاب الأولمبية 2020 المقامة حاليا ف طوكيو.
"تيمانوفسكايا" كانت وصلات لبارح الخميس ل بولونيا، عقدات مؤتمر صحفي قالت فيه أنها استخدمات تطبيق الترجمة (كَوكَل تراديكسيون) باش تطلب المساعدة من السلطات اليابانية، فالوقت اللي كانو مسؤولي الفريق البيلاروسي كايحاولو، فمطار هانيدا بطوكيو، يبززو عليها تركب الطيارة اللي غادية لإسطنبول، وهي قدرات تهرب منهم.
وزادت: "فاش وصلت لمطار هانيدا خدمت التطبيق باش نترجم كلامي لليابانية حيت أنا باغا المساعدة، من بعدها مشيت عند البوليس وعطيتهم الترجمة".
وكانت تيمانوفسكايا ذكرات أن أفراد من البعثة الرياضية لبلادها جاو للشومبر ديالها فقرية اللاعبين، مع ال5 ديال العشية فاللول ديال الشهر، وطلبوا منها تجمع حوايجها باش ترجع لبلادها، وهادشي فقط حيت انتاقدات إدارة فريق بلادها ف "فايسبوك".
واللجنة الأولمبية البيلاروسية كانت قالت أن المدربين قرروا سحب طلب مشاركة العداءة "تسيمانوفسكايا" من الألعاب الأولمبية "بناء على نصيحة الأطباء بشأن حالتها النفسية".
وكانت الحكومة البولونية عطات العداءة تأشيرة دخول لأسباب إنسانية، بعد يوم من رفضها العودة إلى بلادها، كما منحت تأشيرة أخرى لراجلها باش يتبعها.