كيفاش كتتكون المافيا فالبلاد. اعسيلة كيتحدى گاع سلطات الدولة. عندو قرار يسد محلبتو اللي رجعها قهوة شيشا وحجر البوليس الماتيريال ورجع فتح وكيقول : معايا السلطة انا فوق القانون

كنا كنعتاقدو ان القضية بسيطة. مواطن اسمو عسيلة من سطات عندو رخصة يفتح محلبة. حولها لقهوة الشيشا. جاه قرار الاغلاق هادي تقريبا عام. بقى خدام ايام حتى فشي ايام الحجر وقهاوي كثار كانو سادين.
دابا مستمر فخدمتو. جاه البوليس. حجز عدد من الشيشا فمحل ماشي ديالو وزمن كورونا. مشى معاهم اعسيلة ولكن القضاء طلقو. طبعا بان للقضاء باللي ما يستحقش يتابع فحالة اعتقال.
المثير انو غير رجع البارح وفتح محلبتو وهبط الريدو. كيتحدى كلشي. كيقول باللي ناس كثار فالسلطة كتحميه وكدعمو. باللي ما كيخاف من حد.
هادا واحد صغير فمدينة صغيرة. ولكن كيبين لينا باللي فبلادنا كنوجدو للمافيا التربة باش يوليو يحكمو. بحال هاد التصرفات كتخلي امثال عسيلة اللي دابا عندو غير محل الشيشا٬ يزعم. غدا يفتح محل اخر وثالث ورابع حتى يولي عندو شين ديال الشيشا.
كيفاش امثالو اللي كيردد باللي محمي٬ ما بقاش يخاف. ما مسوق لحد.
فحالتو ما خاصو لا يتشد لا والو. غير يطبقو القانون. بغى قهوة٬ يقدم رخصة. من حقو يكون عندو مشروع. غير هي الشيشا فكورونا راه ممنوعة.
تصرفات مول المحلبة كتخلع. تخاف نسدو عينينا وباش نحلوها غدا نلقاو لبلاد فيد امثال عسيلة.