بدأت الحركة الاقتصادية في مدينة السعيدية تنتعش بشكل تدريجي، إذ تعرف توافد أعداد كبيرة من المواطنين على شاطئ السعيدية، فيما تعرف الحانات نشاطا مماثلا، خاصة وأن "السكايرية" هما اللي كيحركو اقتصاد المدينة، لكن التوقيت المعتمد غادي إخلي الجماعة متستافدش من الضرائب، حيت كلشي كيسد مع 11 د الليل. مصادر جد موثوقة قالت في تصريحها أل "كود" أن الضريبة اللي كدخلها جماعة السعيدية من المحلات نتاع الشراب ولوطيلات و "البيران" والريستورات وليبواط، كتبلغ حوالي 700 مليون سنتيم للعام، في حين أيلا تم اعتماد هاد التوقيت فاش غادي ايجيو صحاب الخارج هاد الشي غادي انعكس سلبا على الدخل الضريبي. مول "ريستو بار" فالسعيدية، قال فالتصريح نتاعو أل "كود"، أنه منذ بداية الجائحة نتاع "كورونا" كلا الدق مزيان، وكل ما خلاه ياكل الدق هو التوقيت المعتمد حيت الوقت ولا ما كافيش الناس باش اريحو ويشربوا على خاطرهم، وكيفاش غادي يمكن ليه اخلص لكرا والخدامة. نفس المصدر زاد في التصريح نتاعو كيقول:" الناس كايجيو للسعيدية باش اعومو أف لبحر ومكياساليو حتى أل 6 أد لعشية ووقتاش ادوشو، ووقتاش ابدلو حوايجهم، راه ما إيجيو اوصلو أل مارينا ويدخلو البار حتى يلقاونا كنسدو، وبالتالي راهم خاص اتزاد فالتوقيت حتى أل زوج د الصباح، ديك الساعة بحرا اتحرك شوية القضية". وكايشوف المصدر، أنه أيلا زادت الدولة فالتوقيت، غادي اتحرك العجلة نتاع الاقتصاد فالسعيدية، وكلشي غادي يخدم، بما فيهم "البيران" والريستورات والتاكسيات و لوطيلات والديور نتاع لكراء، حيت "السكايرية" هما بحدهم اللي كينشطو القضية، خاصة وأن السعيدية مدينة سياحية.
