بالقرطاس.. ميريكاني قتل واحد بسباب الكمامة! – فيديو

ميريكاني قتل راجل خدام في سوبر مارشي ( Big Bear Supermarket) ف مقاطعة ديكالب بولاية جورجيا، على قبل الكمامة.
مكتب التحقيقات ف جوجرجيا قال أن القاتل، اللي تعرفات هويتو (فيكتور لي تاكر) و عندو 30 عام، تخاصم مع المستخدم و هو يخرج من المحل بلا ما يشري والو.. و مباشرة من بعد رجع و قصد الضحية، جبد الفردي و تيرا فيه.
ميلودي مادوكس، قائدة بوليس مقاطعة ديكالب، قالت أنهم كانو مخاصمين و من بعد تجبد السلاح و وقع اللي وقع، لكن تفاصيل الحادث و أسبابو الحقيقية مزال ما معروفاش. في حين كايروج أن القاتل ما بغاش يدير الكمامة، وأن الناس كانو شاهدين ملي جبد الفردي وتيرا في المستخدم.
الحادث عرف تدخل السيكوريتي ديال السوبر مارشي اللي تيرا بالقرطاس على "تاكر"، اللي كان باغي يهرب، و صدقو تجرحو بجوج من بعد البوليس اعتاقلو.