إصدار مذكرة بحث دولية فحق مسرب فيديو هناء "مولات الخمار".. وخارجات على القانون: هاد الخطوة إيجابية

عبر ائتلاف 490، صاحب مبادرة "خارجات على القانون"، على الارتياح ديالو حيت هناء، الملقبة بمولات الخمار، ماغترجعش للحبس، بعد تأييد الحكم الابتدائي الصادر فحقها بالسجن شهر وغرامة 500 درهم، لكن هذ الارتياح "لا يخلو من مرارة"، لأنه كان يتوقع هناء تخرج ببراءة
لكن فالمقابل، أشاد ائتلاف 490، فبلاغ ليه حصلات عليه "كود"، بالخطوة "الإيجابية" اللي بادر بيها وكيل الملك بمحكمة تطوان، بإصدار مذكرة بحث دولية فحق الشخص اللي صور وأذاع فيديو الانتقام الإباحي ديال هناء، حيث كانت صدرات قبل مذكرة بحث على الصعيد الوطني فقط.
وشاف الائتلاف ان هذ الإشارات إيجابية، ودعا لانخراط المشرع فهذ الدينامية، فأفق القطع التام مع القوانين السالبة للحريات، و"تحرير المحاكم المغربية من آلاف الملفات اللي كتستنزف الموارد المادية والبشرية المفترض توظيفها في محاسبة الجناة والمجرمين الحقيقيين"، فإشارة للقوانين اللي كتعاقب الناس على ممارسة حرياتهم الفردية.