المغرب غادي يوصلوه 2 مليون جرعة من لقاح سينوفارم الشينوي غدا الحد

قال موقع "ميديا 24′′، ان اليوم السبت، جوج طيارات ديال "لارام" شدو الطريق من مطار محمد الخامس فكازا للشينوا، باش يجيبو جرعات جديدة ديال لقاح سينوفارم الشينوي، غدا الحد 23 مارس، وغالبا العدد ديالها غادي يكون 2 مليون جرعة جديدة.
وبهاد الدفعة، غتكون الشينوا عطات للمغرب 8,5 مليون جرعة، من أصل 40,5 جرعة اللي طلبها منها فالمجموع.
وغير الاربعاء اللي فات، توصل المغرب ب2,2 مليون جرعة من سينوفارم، جابتهم 2 طيارات من نوع "دريم لاينر"، تابعين ل"لارام".
وكان سبق لرئيس المجلس الشعبي الوطني الصيني، لي زانشو، علن فمباحثاتو مع رئيس مجلس النواب المغربي، الحبيب المالكي، ان بلادو غتعطي للمغرب 10 مليون جرعة من اللقاح فشهر ابريل وماي.
وللإشارة، وزارة الصحة بدات هاد السيمانة فتلقيح الفئة العمرية بين 45 و50 عام.
ووصلنا فمجموع الملقحين لأزيد من 7 مليون و600 الف خداو الجرعة اللولة، وكثر من 4 مليون و800 خداو الثانية.
Vaccin : Deux millions de doses Sinopharm attendues ce dimanche 23 mai