ما فهمنا والو، لحد الآن ما كاين حتى شي موعد خاص فى المغرب بالتلقيح، بحال إيلا ما عندنا وزارة ولا ّ أوزير مسؤول على هاد القطاع، الصمت بالفعل حكمة، ولكن ماشي إيلا كان الوضع حرج، فى هاد الحالة خاص المسؤولين إخاطبوا المواطنيين و المواطنات بانتظام و يوميا باش جميع التدابير يتقبّلوها بأريحية أكبر و تكسب الدولة محبة الجماهير وعطفهم، عدم الشفافية، الصمت المطبق وارد غير فى الدول التوتاليتارية و الشمولية، أمّا المملكة حسمات الأمر من شحال هادي، لمّا لتاحقات بالمعسكر الغربي، يعني السفينة الديمقراطية و تركات الحكم المطلق للجارة الشرقية. باش تنجح عملية اللقاح فى انكَلترا طلبات الحكومة من أئمة الجوامع إقوموا بتحسيس الأقلية المسلمة خلال خطب يوم الجمعة، لأن كاين البعض منهم اللي كيضن أن اللقاح حسب إشاعات أو مغالطات غير مسؤولة أن مادة اللقاح متكونة من جيلاتين الحلّوف ولا ّ گاع من خلايا الأجنة، و باش تقلص الدولة من حدة هاد الإشاعات قامت بحملات إعلانية باش تقنع المواطنين و المواطنات بنجاعة اللقاح، و باش ما تبقاش هاد العملية غير هضرة و خلاص تلقّحات حتى الملكة إليزابيث و راجلها، ولكن حتى ملك النرويج و مراتو، أمّا ملك السويد و الملكة غادي اتبعوهم في السيمانات الماجية إيلا جا دورهم، يعني الفئة العمرية اللي كينتاميوْا ليها. باش تقضي على الإشاعات و الأخبار الزائفة طلبات الحكومة النگليزية من شركات وسائل التواصل الإجتماعي حذف هاد المغالطات، لأن كاين البعض اللي كيزعم أن تقنية "إيم، إر،إن، آ" كتغيير جينات بنادم، بلا ما إعرفوا، ولا ّ إبحثوا هادوا حتى شنو هي هاد التقنية أو كيفاش كتمّ، إيلا غاب العلم أو العقل، عمّ الجهل و رجع سيد الموقف. انكَلترا هي اللي متصدرا اليوما الدول الأوروبية اللي كتلقح بكثافة، و باغية الحكومة تلقح حتى 24 ساعة على 24، وحسب استطلاع الرأي كاين حتى %40 اللي باغيين يتسنّاوا حتى 4 ديال الصباح باش يتلقحوا، الوضع صعيب شي شوية فى النكَليز، تقريبا كل 30، 40 ثانية كيدخل شي حدّ للسبيطار، على داك الشي سدّات انكَلترا المطارات فى أوجه الزوار من أمريكا الجنوبية ولا ّ البرطقيز، أمّا لوخرين ضروري التيست والحجر الصحي لمدة 10 إيام. لحد الآن برنامج التلقيح النكَليزي ناجح، لأن الحكومة تمكّنات تشري 2 لقاحات فى دقّة وحدة، "آسترا/زينيكا"، "بايونتيك/فايزر"، و حتى منتصف شهر فبراير غادي إكونوا كثر من 15 المليون تلقحوا، و في شهر مارس غايجي دور الناس اللّي في عمرهم 50 عام، يعني تقريبا 20 مليون، هاد الشي اللي بغينا حتى حنا، تكون عندنا استراتيجة واضحة المعالم، مسؤولين كيوفيوْا بالوعود اللي عطاوْا للشعب. رخّصات الحكومة النكَليزية ل 3 ديال اللقاحات لحد الآن، حتى "موديرنا" اللي قام بتطويرو الدكتور منصف السلاوي، انكَلترا فضّلات ترخص بسرعة لثلاثة ديال اللقاحات و قبلات تخلص أثمنة مرتافعة بلا تبدا كتشطّر و تضييع في الوقت، نفس الطريقة اللي اتّبعات إسرائيل اللي لقحات لحد الآن كثر من %20 من مواطنيها، هادا هو التفاني و الإخلاص في العمل المتقون، ما كتبقاش فى القشور، ولكن ديما في المضمون، الملموس، أمّا المسّوس، ديما فى زيتو محبوس.
